د سرحدونو، قومونو او قبایلو چارو وزیر الحاج ملا نورالله نوري د بدخشان ولایت له قومي مشرانو سره وکتل
١٤٤٤قمري کال د ربيع الااول١٠مه
د سرحدونو، قومونو او قبایلو چارو وزیر الحاج ملا نورالله نوري نن د بدخشان ولایت له دیني عالمانو، قومي مشرانو، سپین ږیرو او مخورو سره د وزارت د کنفرانسونو په تالار کې په داسې حال کې ولیدل چې د جرګو او قبایلي چارو د همغږۍ مرستیال ښاغلی عبدالخالق عابد او مسلکي مرستيال عبدالرحمن حقاني هم حضور درلود. یاده کتنه د قرآن عظیم الشان د څو مبارکو ایتونو په تلاوت سره پیل شوه، د راغلو مشرانو په استازولي مجیب الرحمن اخندزاده، نور رحمان عطايي، حاجي نعمت الله او غلام محمد خبرې وکړې. دوئ په خپلو خبرو کې د اسلامي نظام تر چتر لاندې ژوند کول د الله جل جلاله ستر نعمت ياد کړ او دغه راز يې د ښاغلي ملا نورالله نوري له هڅو او نوښتونو څخه مننه وکړه، زیاته يې کړه تاسې د قومونو ښه استازولي کوئ، موږ باور لرو چې د اسلامي امارت په اقتصادي او ټولنيزو برخو کې هم ستاسو د هڅو او هاند تمه لرو. يادو مشرانو د يو لړ ځايي ستونزو تر څنگ له سرپرست وزير څخه وغوښتل چې د ورېښمو تجارتي لارې په خلاصولو او د بدخشان ملکي او حوزوي روغتونونو د ظرفيت لوړنې په موخه دې له دوی سره همکاري وکړي. ورپسې ښاغلي الحاج ملا نورالله نوري یادو مشرانو ته د ښه راغلاست او هرکلي وروسته پامير او واخان ته د خپل تاريخي سفر په اړه مقدماتي خبرې وکړې، نوموړي په خپلو خبرو مې وويل: دا زموږ دنده او مسؤليت دی چې د افغانستان په ټولو ولايتونو او ولسواليو کې د خپلو ولسونو او قومونو ستونزې او غوښتنې واورو؛ تر منځ يې د شخړو د حل کولو او خپلمنځي پخلاينې، د بيارغونې او هر راز اقتصادي او اجتماعي چارو د همغږي کولو دنده سرته ورسوو. همدا راز يې په خپلو خبرو کې بدخشان ولايت د تاریخ په اوږدو کې يو له مهمو او ستراتژيکو ولايتونو څخه ياد کړ او د ورېښمو تاريخي تجارتي لارې د خلاصولو په اړه یې د پوره هڅو او له اړوند ادارو سره د حل په موخه د دې سترې اقتصادي پروژې د شریکولو ډاډ ورکړ.
