بادغيس کې د دوو قومونو ترمنځ ۳۵ کلنه خونړۍ شخړه حل او فصل شوه
چهارشنبه ۲۸ جمادی الأولی۱۴۴۷
د سرحدونو، قومونو او قبايلو چارو وزارت د يوه پلاوي په منځګړيتوب په بادغيس ولايت کې د دوو قومونو ترمنځ نيږدي ۳۵ کلنه اوږدمهاله او خونړۍ شخړه په سوله ييز ډول هواره شوه. ياد پلاوی، چې د دعوت او ارشاد رئیس مفتي شفیعالله ثاقب په مشري او د وزارت له نورو مسؤلینو څخه جوړ شوی وو د شخړې د حل په موخه ياد ولايت ته سفر وکړ او د کلونو کلونو دښمني ته يې د پای ټکی کيښود.
د دغه شخړې د حل په مناسبت جوړو شويو مراسمو ته د بادغيس والي، سيمهييزو مشرانو، دیني عالمانو او د اسلامي امارت منسوبینو په خپلو خبرو کې وويل: افغانستان د اوږدو جګړو له امله د کورنيو دښمنيو شاهد پاتې شوی، خو د اسلامي امارت په حاکميت سره اوس د شخړو د حل او ټولنيز ثبات هڅې پياوړې شوې دي. دوی زیاته کړه، چې قومي او ژبني اختلافات کمزوري شوي او د شريعت په رڼا کې د شخړو د هواري لړۍ په چټکۍ روانه ده، چې د همدې هڅو په پایله کې دغه دی نن د درې لسیزو شخړه پای ته ورسيده.
ياده شخړه، چې د بادغيس ولايت غورماچ ولسوالي په تخت خاتون سيمه کې د یوې حقوقي موضوع پر سر رامنځته شوې وه له دواړو لورو څخه لس تنه پکې وژل شوي او پراخ مالي زیانونه یې اړولي وو، چې د مسؤلينو د مسلسلو هڅو په نتیجه کې دواړه خواوې د سولې په ټغر سره کيناستلې او د ورورولۍ ژمنتیاوې یې یو ځل بیا تازه کړې. په پای کې د دواړو قومونو استازو د وزارت له مسؤلینو مننه وکړه او ويې ويل: درې لسیزې کړاوونه، سختې او تربګنۍ یې تېرې کړلې خو اوس الحمدلله د اسلامي امارت په منځګړيتوب بېرته د ورورولۍ، امن او ګډ ژوند تر سره کولو ته را وګرځيدل.
