د غزني، پکتيا او پکتيکا ولايتونو له يو شمېر قومي مخورو سره ليدنه
شنبه ۱ صفرالمظفر ۱۴۴۷
د سرحدونو، قومونو او قبايلو چارو وزير الحاج ملا نور الله نوري نن مخکې له غرمې په خپل کاري دفتر کې د غزني، پکتيا او پکتيکا ولايتونو له يو شمېر قومي مشرانو او سپين ږيرو سره وکتل.
د دغې کتنې پرمهال قومي مشرانو د اسلامي امارت د کلک ملاتړ ترڅنک دا نظام د ولسونو د يووالي او هوساينې لپاره مهم وباله او په ساتنه کې يي د دې خاورې هر وګړی مسؤل ياد کړ. دوی همداراز له ښاغلي نوري سره خپلې سيمه ييزې ستونزې ، چې پکې زده کړو ته لاس رسی ، رغنيزې چارې او روغتيا برخه شامله وه شريکې کړې او د حل په موخه يي د لازمو اقداماتو غوښتنه وکړه.
د سرحدونو، قومونو او قبايلو چارو وزير ښاغلي نوري يادو قومي مشرانو ته د ښه راغلاست ترڅنګ د اسلامي نظام پر حاکميت کې د ولسونو جهادي قربانۍ وستايلې. نوموړي د قومونو ترمنځ په اتحاد، اتفاق او يووالي ټينګار وکړ او همدا راز يې د ورغليو قومي مشرانو د ستونزو د حل په موخه ډاډ هم څرګند کړ. هغه ژمنه وکړه، چې د دغو قومي سپين ږيرو ستونزې به د حل لپاره تر لوړ رتبه مشرانو ورسوي.
