د زابل ولايت د قومي مشرانو او مخورو ستونزې واورېدل شوې!
د سرحدونو او قبایلو چارو وزارت سرپرست محترم ملا نورالله نوري ښاغلي نن غرمه د زابل ولايت له یو شمېر قومي مشرانو او مخورو سره د وزارت د کنفرانسونو په تالار کې وکتل او ستونزې يې واورېدې.
د کتنې په پیل کې ديني عالم محترم مولوي صاحب اسماعيل او قومي مشر انجينر حضرت يعقوب د نورو په استازیتوب د اسلامي امارت د فتوحاتو او برياوو له امله مبارکي وويله او خپلې یو لړ سیمه ییزې ستونزې يې د حل په موخه شریکې کړې وې ویل: هڅه مو دا ده، چې په هېواد کې د مېشتو قومونو د یووالي او د اسلامي نظام ملاتړ ته د خلکو رابللو په برخو کې کار وکړو، ترڅو هېوادوال مو له هوسا ژوند څخه برخمن شي.
ورپسې ښاغلي ملا نورالله نوري له زابل څخه د راغلو قومي مشرانو ستونزې پرځای وبللې وې ویل: دا زموږ مسؤلیت او لومړیتوب دی، چې د خپل ولس ستونزو ته د حل لارې چارې پیدا او په دې برخه کې رښتینې هلې ځلې وکړو.
ښاغلي نوري د خپلو خبرو په دوام وویل: دنده امتياز نه بلکې د الله ج او خلکو په وړاندې مسووليت دی، موږ د ولس خدمتګاران يو او ژمن يو چې خپل ولس ته د اسلام د مقدس دين په رڼا کې کار وکړو.
اوس ددې وخت رارسيدلې، چې يو بل په غېږ کې ونيسو او په ګډه د هېواد او نظام ساتلو او پرمختګ لپاره هلې ځلې وکړو.
