د وزارت کارکوونکو ته د نوي ټاکل شوي مسلکي معین پېژندنه!
ښاغلی محمد آصف ننګ، چې د وزارت په وړاندیز او د جمهوري ریاست د عالي مقام د حکم پر بنسټ د سرحدونو او قبایلو چارو وزارت د مسلکي معین په توګه ټاکل شوی دی، د یوې غونډې په ترڅ کې د وزارت کارکوونکو ته وروپېژندل شو.
په هغه غونډه کې چې په همدې مناسبت د ۱۴۰۰ لمریز کال د غویی پر۲۰ نېټه جوړه شوې وه د سرحدونو او قبایلو چارو وزیر ښاغلي محب الله صمیم، د وزارت رهبري، یو شمېر مېلمنو او کارکوونکو ګډون کړی و.
ښاغلي صمیم په خپلو خبرو کې ښاغلی ننګ په علمي او تخنیکي لحاظ یو مجرب او کار پوه شخص وباله وې ویل: چې ښاغلي ننګ په تېرو شلو کلونو یا د دموکراسۍ په دوو لسیزو کې په بېلابېلو ادارو کې په نیک نامۍ دنده ترسره کړې او په ټولو برخو کې یې عملا کار کړی دی.
دغه راز یې د ښاغلی ننګ د ټاکنې په اړه له ښاغلي جلالتماب جمهور رئیس څخه مننه وکړه وې ویل: خدای(ج) دې د ښه او غوره خدمت کولو توفیق ورکړي، دا هېواد د ټولو ګډ کور دی، ارمانونه او هبلې مو سره شریکې دي په شریکه به کار کوو او د هېواد د پرمختګ لپاره به لا ډېر څه کوو. ډاډ یې څرګند کړ، چې ښاغلی ننګ د کارکولو ښه ظرفیت لري. د وزارت له رهبرۍ یې وغوښتل چې له ده سره په همکارۍ چارې پر مخ یوسي، تر څو د خلکو او نظام په وړاندې خپل مسولیتونه په ښه توګه ترسره کړو. همدارنګه یې له مخکني مسلکي معین ښاغلي ډاکټر فریدون بارکزي څخه هم چې په عزت او افتخار یې کار کړی دی مننه وکړه.
په دې غونډه کې پخواني مسلکي معین ښاغلي ډاکټر فریدون بارکزي هم خبرې وکړې ادلون بدلون یې په دولتي ادارو کې یو اصل وباله له رئیسانو نه یې غوښتنه وکړه، چې له نوي معین سره د پخوا په شان پوره همکاري وکړي.
د سرحدونو او قبایلو چارو وزارت نوي مسلکي معین ښاغلي محمد آصف ننګ هم د دولت رهبرۍ له وار وار باور او د سرحدونو او قبایلو چارو وزارت مقام له خلوص څخه مننه وکړه وې ویل: هڅه به مې دا وي چې د ماموریت یوه کامیابه برخه اوسم، په ګډ کاریې ټینګار وکړ.
په پای کې د وزارت د جرګو او قبایلي چارو د همغږۍ معین ښاغلي احمدزي د وزارت د کارکوونکو په استازولۍ د همکارۍ ډاډ ورکړاو غونډه یې په دعا سره پای ته ورسوله.
یاده دې وي، چې ښاغلي ننګ تردې مخکې د پوهنې وزارت معین، سرپرست، نشراتو د مسؤل، د فراه او لغمان ولایتونو د والي او د جمهوري ریاست په اړوند ادارو کې یې هم کارکړی اوخپله دنده یې په بریالیتوب ترسره کړې ده.
