په نورستان او هرات ولايت کې د اسلامي اخوت او ولسي ستونزو اورېدو غونډې ترسره شوې
دوشنبه ۸ ربيع الأول ۱۴۴۷
د نورستان ولایت په کانتیوا او د هرات ولایت په کرخ ولسوالي کې د قومي مشرانو، دیني علماوو او د خلکو د استازو په ګډون پراخې غونډې ترسره شوې. په دغو غونډو کې د سیمو اوسېدونکو خپلې ټولنیزې، اقتصادي او سيمه ييزې ستونزې له مسؤلینو سره شریکې کړې او د حل لپاره یې غوښتنه وکړه.
ګډونوالو د خپلو سیمو د عامه خدماتو د نشتون، د سړکونو خرابوالی، د ښوونیزو، روغتیایي مرکزونو د کمښت او د ځینو سیمه ییزو شخړو یادونه وکړه. يادو ګډونوالو د اسلامي امارت له مشرانو وغوښتل چې د دغو ستونزو د حل لپاره عملي ګامونه واخلي ترڅو خلک له اسانتياوو برخمن شي.
د غونډې په اوږدو کې مسؤلینو د خلکو غوښتنې واورېدې او ډاډ یې ورکړ، چې د ټولو ستونزو د حل لپاره به اړونده ادارې راجلب شي. دوی زیاته کړه چې د ولس غږ ته غوږ نیول د اسلامي امارت له مهمو دندو څخه دي تر څو مشکلات يې يو په بل پسې حل شي.
