د کندهارسياسي او قومي مشرانو د يووالي او اتحاد غږ پورته کړ!
د سرحدونو او قبايلو چارو وزير محترم محمد شفيق ګل آغا شېرزي په کندهار کې په خپل مېلمستون کې د کندهار له سياسي او قومي مشرانو، بانفوذه او مطرحو شخصيتونو ، مخورو، ځوانانو اوټولنيزو فعالانو سره وکتل، چې په ترڅ کې يې ټولو ګډونوالو د يووالي او اتحاد غږ پورته کړ .
ښاغلي شېرزي په دې لويه غونډه د افغانانو ترمنځ د اتحاد او اتفاق، د هېواد د روانو حالاتو او د باعزته سولې په راتلونکو بين الافغاني خبرو اترو کې د قومي مشرانو، با نفوذه شخصيتونو او مخورو رول مهم وباله.
ورپسې د کندهار قومي او سياسي مشرانو په خپلو خبرو کې سوله د افغانانو اساسي اړتيا وبلله او ټولو ګډونوالو په يوه غږ د سولې او ملي يووالي په ټينګښت کې د افغانانو ترمنځ په يووالي او اتحاد ټينګار وکړ، ډاډ يې ورکړ، چې په خپل ټول توان، ظرفيت او قومي نفوذ سره به په دې برخه کې هاند او هڅه وکړي، تر څو هېواد کې د جګړو او ناخوالو ټغر ټول او سوله ټينګه شي.
