د منګلو او خروټو له قومي مشرانو سره لیدنه
د سرحدونو او قبایلو چارو وزارت د جرګو او قبایلي چارو د همغږۍ معین ښاغلي محمد یعقوب احمدزي نن چهارشنبې د ۱۳۹۸ لمریز کال د زمري په ۳۰ نېټه په داسې حال کې، چې ورسره مل پلاوی هم حاضر ؤ د پکتیا ولایت په ډنډ پټان ولسوالۍ کې د منګلو او خروټو قومونو تر منځ پر ځمکي او غره باندې د روانې شخړې د حل په موخه د دواړو قومونو له قومي مشرانو سره په جلا جلا توګه وکتل.
په لیدنه کې دواړو لورو وویل، چې تر ۲۰ کلونو ډیره موده کیږي، چې په ډنډ پټان ولسوالۍ کې پر غره او ځمکي د منګلو او خروټو دعوه ده، چې په دې ترڅ کې د دواړو لورو تر منځ وسلوالي نښتې هم شوي، چې اوس هم جګړه روانه ده او په دې جګړې کې دواړو لورو ته ځاني او مالي زیانونو اوښتي دي.
قومي مشرانو وویل: موږ غواړو، چې زموږ تر منځ د راغلي پلاوي له خوا سمه پریکړه وشي، تر څو جکړه پای ته ورسیږي او دواړه وروڼه قومونه په سوله کې ژوند وکړي.
وروسته ښاغلي احمدزي او د پلاوي نورو غړو دوی ته ډاډ ورکړ، چې د دواړو لورو تر لیدنې او د خبرو تر اوریدولو وروسته به اسنادو ته په کتو سره هڅه وکړي، چې داسې سمه او عادلانه پریکړه وکړي، چې ټولو ته د منلو وړ وي.
