د لوګر ولایت ولسونو ته د پراختیایي خدمتونو وړاندې کولو په موخه د ټاکل شوي پلاوي سفر
چهارشنبه ۱۴۴۶/٧/۲۲
د سرحدونو، قومونو او قبایلو چارو وزارت د سرحدي پلټنو معین الحاج مولوي محمد اسماعیل غزنوي ته د یوه پلاوي په مشري دنده سپارل شوې وه، ترڅو په لوګر ولایت کې د مرستیال والي په مشري د ډیورنډ فرضي کرښې ته څېرمه ولسوالیو خلکو ته د خدمتونو وړاندې کولو کمېټه جوړه کړي.
د دغه کميټې له جوړولو وروسته د سرحدونو، قومونو او قبايلو چارو وزارت د پلان او پالیسۍ رئیس مولوي محمد نادر سنګین، د ښوونې او روزنې رئيس مولوي عبدالرحمن رحماني او مل پلاوي لوګر ولایت ته د سفر پر مهال د دغه ولایت له مرستیال والي محمد انور دين پرور او د اړونده ادارو له مسؤلينو سره وکتل.
دغه سفر داسې مهال ترسره کيږي چې د امیرالمؤمنین حفظه الله تعالی د حکم پر بنسټ د سرحدونو، قومونو او قبايلو چارو وزارت ته دنده سپارل شوې وه، چې د لرې پرتو او له خدمتونو څخه بې برخو سیمو د لومړنیو ستونزو را ټولولو لپاره يوه کمېټه جوړه کړي تر څو د یوې ځانګړې کړنلارې له مخې یادو ولسونو ته د سرکونو، روغتیا، اوبو او انرژۍ، مخابراتو، ښوونې او روزنې په برخو کې عملاً کارونه پیل شي.
