د غزني په ناور ولسوالۍ کې ۲۳ کلنه شخړه حل شوه
۱۳/۲/۱۴۴۵
د غزني ولایت ناور ولسوالۍ د ګرم آب په سیمه کې د هزاره او کوچي قومونو تر منځ د ځمکو او څړځایونو پر سر را منځته شوې شخړه چې له ۲۳ کلونو را په دېخوا یې جریان درلود نن د یوې ناستې په ترڅ کې حل شوه.
یاده شخړه چې له کبله یې یو تن هم وژل شوی و، نن ورځ یې د یاد ولایت د سرحدونو، قومونو او قبایلو چارو ریاست، د شخړو د حل کمیسیون او د دواړو لوریو د قومي مشرانو له لوري روغه جوړه وشوه.
د هزاره وو د رضا بیګ قوم او د جوري کوچیانو تر منځ دغه منازعه چې د ناور ولسوالۍ د ابتدائیه محکمې له لوري د شخړو د حل کمېسیون ته راجع شوې وه، تر څېړنو او تحقیق وروسته د طرفینو او قومي مشرانو په حضور کې د نوموړي پلاوي له لوري پرېکړه ونیول شوه، یو لوري ته په کې یو څه نغدي پیسې د قتل د دیت په شکل ورکړل شوې او دواړه لوري یې ورورولۍ ته راوبلل.
د یادونې وړ ده چې د سرحدونو، قومونو او قبایلو چارو وزارت د هیواد په ټولو ولایتونو کې د خلکو ترمنځ شخړې حل کړې دي او د قومونو ترمنځ ناخوالو ته یې د روغو جوړو په واسطه د پای ټکی ایښی دی.
