د افغانستان لپاره د م.م د سرمنشي د ځانګړي استازي مرستیال او د یوناما سرپرست «مارکُس پوټزل» سره کتنه.
۲۲/جمادي الثاني/۱۴۴۴ هـ ق
د سرحدونو، قومونو او قبایلو چارو سرپرست وزير الحاج ملا نورالله نوري د افغانستان لپاره د ملګرو ملتونو د سرمنشي د ځانګړي استازي مرستیال او د یوناما سرپرست «مارکُس پوټزل» سره نن تر غرمې مخکې په خپل کاري دفتر کې وکتل.
په دې لېدنه کې ښاغلي پوټزل د افغان ښځو پر کار بندیز او ځينو نورو محدوديتونو په اړه خپلې اندېښنې شريکې کړې، په وينا يې چې ياده چاره به د بشري مرستو د رسولو بهیر ټکنی کړي.
ښاغلي نوري له ټولو هغو جهتونو نه مننه وکړه چې د افغانستان له خلکو سره يې په مختلفو برخو کې خپلې مرستې کړې او دوام ورکوي.
نوموړي د يوناما دفتر اندېښنو ته په اشارې وويل: د اسلامي امارت رهبري هڅه کوي چې خلکو ته د اسانتياو د برابرولو تر څنګ زموږ ديني او کلتوري ګروهنې ته په کتو سره د يادو ستونزو اساسي حل را وباسي.
ښاغلي نوري د ملګرو ملتونو له اړوند بشري مرستندويه سازمانونو څخه وغوښتل چې د خپلو مرستو بهير دي له مرکزي سېمو څخه اطرافي او ليري پرتو سېمو ته وغځوي تر څو د محرومو سېمو خلکو ته هم بشري مرستې ورسيږي.
