خوست کې د ۲۸ کلنې شخړې حل
یکشنبه ۷/ رجب المرجب/ ۱۴۴۷
د خوست ولایت د سرحدونو، قومونو او قبایلو چارو رياست رئيس مولوي ميا محمد ولي صديقي په مشري د قومي مشرانو، متنفذينو او ځايي ديني عالمانو په منځګړيتوب د دغه ولسوالي په يګدن سيمه کې د دوو پلرنيو کورنيو ترمنځ د شاوخوا ۲۸ کلونو اوږدمهاله شخړه حل او ښکېلو خواوو د ورورولي ژوند پيل کړ.
د دې شخړې پر مهال دواړو لوريو ګڼې کورنۍ ستونزې ګاللې، چې د هغوی ژوند يې تريخ کړی وو او هیڅ ډول راشه درشه يې سره نه لرله. مسؤلينو په خپل منځګړيتوب سره لومړی موضوع وڅېړله بيايې واکونه ترې واخېستل او د شريعت په رڼا کې يې د هغوی ترمنځ په فيصلې کولو سره غاړه غړۍ کړل.
په پای کې دواړو کورنیو په یاده پریکړه رضایت څرګند کړ او ژمنه یې وکړه، چې له دې وروسته به هيڅ ډول بد اقدام او کرکه نه کوي بلکې د اخوت ژوند ته به دوام ورکوي
