له علمي، فرهنګي شخصیتونو، قومي مشرانو او ټولنیزو فعالانو سره کتنه!
د سرحدونو او قبایلو چارو سرپرست او نوماند وزیر ښاغلي محب الله صمیم نن سې شنبې د روان لمریز کال د تلې میاشتې پر ۸ مه نېټه له یو شمېر علمي، فرهنګي، قومي شخصیتونو او مدني فعالانو ښاغلي غرزی لایق، ښاغلي محمود خان سلیمان خېل، آغلې سهیلا اصغري، د پخلاینې عالي شورا له مرستیال ښاغلي الحاج نثارالدین بریالي او یو شمېر ځوانانو سره د خپل کار په دفتر کې وکتل.
په یاده کتنه کې، چې د وزارت مسلکي معین ښاغلی ډاکټر فریدون بارکزی او د سرحدي څېړنې معین ښاغلی ډاکټر محمد آصف قاضي زاده هم حاضر وو، راغلو مشرانو او شخصیتونو د خپلو یو لړستونزو شریکولو ترڅنګ په علمي او فرهنګي مسایلو بحث او خبرې وکړې، چې ښاغلي غرزي لایق د ارواښاد اکاډمېسن سلیمان لایق په نوم د بنسټ د جوړېدو په اړه معلومات وړاندې کړل او د همکارۍ غوښتنه یې وکړه. دغه راز ځیني کتابونه یې ښاغلي محب الله صمیم ته ډالۍ کړل.
ورپسې د سرحدونو او قبایلو چارو سرپرست او نوماند وزیر ښاغلي محب الله صمیم د دوی ستونزې پر ځای وبللې او د علمي او فرهنګي اړیکو په ټینګښت او پراختیا یې ټینګار وکړ، چې په دې برخو کې یې د ارواښاد اکاډمېسن سلیمان لایق فعالیتونه د ستاینې وړ وبلل او د خپلو همکاریو ژمنه یې وکړه.
د یادونې وړ ده، چې په دې کتنه کې ښاغلي محب الله صمیم د وزارت له خوا چاپ شوي کتابونه نوموړو ته ډالۍ کړل.
