له قومي مشر او مخور سره کتنه!
د سرحدونو او قبایلو چارو وزیر ښاغلي محمد شفیق ګل آغا شېرزي نن دوشنبې د ۱۳۹۸ لمریز کال د لیندۍ میاشتې په ۱۸ مه نېټه په داسې حال کې، چې د وزارت مسلکي مرستیال ښاغلی ډاکټر فریدون بارکزی، د دفتر رئيس ښاغلی نور آقا ناصري او د ولایتونو سره د اړیکو ریاست سرپرست ښاغلی حمیدالله خېبر هم حاضر و، د لغمان ولایت له قومي مشر او مخور ښاغلي جنرال محمد زمان مموزي سره د خپل کار په دفتر کې وکتل.
په دې کتنه کې راغلي قومي مشر د یو لړ سیمه ییزو ستونزو شریکولو ترڅنګ د وزارت د مشرتابه هڅې د سولې، ملي یووالي د ټینګښت او د قومونو د انسجام په برخه کې وستایلې او د موجوده نظام څخه یې خپل ملاتړ څرګند کړ.
ورپسې د سرحدونو او قبایلو چارو وزیر ښاغلي محمد شفیق ګل آغا شېرزي په خپلو خبرو کې د یاد قومي مشر او مخور ستونزې پر ځای وبللې او د خپلو تلپاتو همکاریو ډاډ یې ورکړ.
