هلمند کې دوه جلاجلا مرګوني شخړې هوارې شوې
سه شنبه ۳۰ ذوالحجة الحرام ۱۴۴۷
د هلمند ولايت ناوه ولسوالۍ په ګوهرګين سيمه کې د دوو کورنيو ترمنځ د ځمکې د اوبو پر سر را پورته شوې شخړه، چې له کبله يې يوکس وژل شوی او اته نور پکې ټپيان شوي وو، د ياد ولايت د سرحدونو، قومونو او قبايلو چارو رياست د مسؤلينو، قومومي مشرانو، ديني عالمانو په دوامدارو هڅو حل او فصل شوه.
همداراز د ياد ولايت په نادعلي ولسوالۍ کې هم د څو کورنيو ترمنځ د مېرمنو پر سر هغه را پورته شوې شخړه هواره شوه، چې په ترڅ کې يې يوکس خپل ژوند له لاسه ورکړی و او ګڼې خپل منځې ستونزې يې را ولاړې کړې وې.
د هلمند ولايت د سرحدونو، قومونو او قبايلو چارو رياست استازو د يادو دواړو پېښو د قورباني شويو کورنيو مشرانو ته د تسليت ترڅنګ له هغوی وغوښتل، چې تېر هېر کړي او راتلونکی ژوند په سوله ورورولي او يوبل منلو سره ترسره کړي.
