په جوزجان کې ۱۲ کلنه شخړه په دوستي بدله شوه

شنبه ۸/۲/۱۴۴۷ د جوزجان ولایت د سرحدونو،قومونو او قبایلو چارو ریاست مسؤلینو د یاد ولایت د قوش تپې ولسوالۍ په نوآباد کلي کې د دوو کورنیو ترمنځ ۱۲ کلنه شخړه حل کړه او دواړه لوري یې د ورورګلوۍ په ټغر کښېنول. دغه شخړه له څه باندې یوې لسیزې راهیسې په یاده سیمه کې د څو مېشتو پښتنو او اوزبکو کورنیو ترمنځ د څړځایونو پرسر پېښه شوې وه، چې له امله یې ښکېلې غاړې له ډېرو ستونزو سره مخ وې او د دوی ترمنځ یې سخت جنجالونه رامنځته کړي وو. دا چې یاده موضوع د سرحدونو، قومونو او قبایلو چارو ریاست مسؤلینو ته راجع شوه، هغوی هم د سیمې د مخورو په همکاري، یادې سیمې ته سفر وکړ، د دواړو خواوو له اسنادو او د سیمې له کتنې وروسته یې یوې ناستې پرمهال د دوی ترمنځ د سولې فیصله وکړه. دغه فیصله د دواړو خواوو د قناعت وړ وګرځېده او ژمنه یې وکړه چې نور به یو بل ته خنډونه نه جوړوي او د کورنۍ د غړو په څېر به له یو بل سره ژوند کوي.