په بلخ ولايت کې د درې کلنې شخړې پای
يکشنبه ۱۴۴۶/۶/۶
د ياد ولايت په چهاربولک ولسوالۍ کې د دريو بېلابېلو کورنيو ترمنځ په يوه شخړه کې چې، درې کلونه يې دوام درلود او له امله يې دوه کسان مړه شوي وو او يو بل پکې ټپي شوی هم و په سولييزه توګه حل شوه.
د بلخ ولايت د سرحدونو، قومونو او قبايلوچارو رياست مسؤلينو، قومي مخورو، علماوو او ځايي خلکو په دوامداره همکاريو د دغو کورنيو د مشرانو سره لومړی جلاجلا ناستې وشوې، د سولې او بښنې په تړاو وپوهول شول اوبيا دې ته راضي کړل شول چې د دښمني پر ځای د ورورۍ لار غوره کړي، چې په همدې توګه يې مسؤلينو ترمنځ د خير فيصله وکړه او درې واړه کورنۍ يې سره پخلا کړې.
همدا راز د دغه ولايت په مزار شريف ښار کې هم د دوو کورنيو ترمنځ د کورني جنجالونو له امله درې کلنه شخړه پای ته ورسېده او ښکېلو اړخونو د خوښۍ ژوند پيل کړ، د بلخ ولايت د سرحدونو، قومونو او قبايلو چارو رياست مسؤلينو دا شخړه داسې مهال هواره کړه، چې لومړی يې ښکيل اړخونه راضي کړل او بيا یې تر منځ د عادلانه فيصلې په کولو سره غاړه غړۍ کړل.
د سرحدونو، قومونو اوقبايلوچارو وزارت تل هڅه کوي، چې د خپلو محلي ادارو په مرسته د ولسونو ترمنځ هره لويه او وړه ستونزه په سولييزه توګه حل کړي او خلکوته د ارام ژوند زمينه برابره کوي.
