په بلخ ولایت کې یوه ولسي غونډه جوړه شوه
د بلخ ولایت دچمتال ولسوالۍ په البرز کوټ سیمه کې د (ملي یووالي ټینګښت، همغږي او له اسلامي نظام څخه د ملاتړ) تر عنوان لاندې یوه ولسي ناسته جوړه شوه. دغه ولسي غونډه د یاد ولایت د سرحدونو، قومونو او قبایلو چارو ریاست له لوري جوړه شوې وه چې ګڼ شمېر قومي مشرانو او ولسي خلکو پکې ګډون کړی وو.
په غونډه کې د بلخ ولایت د سرحدونو، قومونو او قبایلو چارو رئیس مولوي سردار محمد محمدي خبرې وکړې اسلامي نظام یې د الله (ج) یو ستر نعمت وباله او ویې ویل: د مجاهدینو د وینو، قربانیو او ستړیاوو په نتېجه کې افغان ولس له ښکېلاک څخه خلاص شو او اوس الحمدلله زموږ په ګران هیواد کې ټول ولسونه د یووالي په فضاء کې د اسلامي نظام تر سیوري لاندې ژوند کوي. هغه زیاته کړه: په دې نظام کې هیڅ یو قوم پر بل برتري او بهتري نه لري بلکې بهتر هغه څوک دی چې متقي وي.
د همغږۍ په دغه جوړه شوې ناسته کې د مختلفو قومونو او سیمو په استازیتوب څو تنو قومي مخورو هم ویناوې وکړې، د قومونو د اتحاد په اړه یې ډاډ څرګند کړ او د ځینو ستونزو د حل غوښتنه یې وکړه.
