په دایکندي ولایت کې رامنځته شوې شخړه حل شوه
۴/۷/۱۴۴۵
په دایکندي ولایت د نيلي او پاتو ولسوالیو د دوو کورنيو تر منځ د کورنیو موضوعاتو په اثر رامنځته شوې شخړه د سرحدونو، قومونو او قبایلو چارو آمریت په همغږۍ او د سیمې د قومي مشرانو په همکاري حل شوه.
په دغه شخړه د دواړو کورنیو تر منځ د اختلافاتو په پایله کې یو تن سخت ژوبل شوی و، چې بالآخر د یاد آمریت د آمر حافظ محب الله سجاد او د قومي مشرانو د منځګړیتوب له برکته د شخړې دواړه لوري د اختلافاتو حل ته راضي شول. دوی د یوې ناستې په ترڅ کې ژمنه وکړه چې په ګډه به د ورورګلوۍ ژوند کوي او یو بل ته به نور زیان نه رسوي.
په دغه بدي کې ښکېلو غاړو د آمریت له مسؤلینو او له قومي مشرانو څخه مننه وکړه چې دوی یې یووالي ته راوبلل، او د یادې موضوع په حل کولو کې یې د دوی همکاري وکړه.
