د بغلان ولایت له خلکو سره کتنه.
د سرحدونو، قومونو او قبایلو چارو وزارت سرپرست وزیر الحاج ملا نورالله نوري د بغلان ولایت د مرکز او ولسوالیو له علماء او قومي مخورو سره په داسې حال کې وکتل چې د یاد ولایت والي الحاج مولوي عبدالرحمن حقاني هم حضور درلود.
په یاده ناسته کې ښاغلي نوري شمالي ولایتونو ته سفر له قومونو سره د همغږۍ غونډې کول، د هغوی ستونزې اورېدل او د بندرونو څارنه یاده کړه.
همداراز یې زیاته کړه چې دا زموږ دنده ده چې په ولایتونو کې له قومي سپین ږیرو، علماء او عامو خلکو سره وګورو او د دوی ستونزې واورو، نوموړي د خپلو خبرو په اوږدو کې وویل: په افغانستان کې جهادونه همدې قومونو او ملتونو کړي دي، دوی و چې څلویښت کاله یې له خپلو مقدساتو، عنعناتو او اسلامي شعائرو دفاع وکړه. هغه د مسؤلیت په اړه زیاته کړه هر څوک دې خپل مسؤلیت ته متوجه شي مسؤلیت یو دروند بار دی هر څوک یې باید په ښه ډول سر ته ورسوي.
وروسته علماء او قومي مخورو په خپلو خبرو کې د ا.ا.ا په راتګ سره د امنیت، اتحاد، یووالي او بیا رغونې په برخه کې له اقتصادي هڅو خوښي وښوده او له ا.ا.ا سره یې په هره برخه کې د همکاري ډاډ څرګند کړ، همداراز یې خپلې غوښتنې او ستونزې شریکې کړې چې د سرحدونو، قومونو او قبایلو چار وزارت د سرپرست لخوا د هر اړخیزې همکاري او تر لوړو مقاماتو د رسولو ډاډ یې ورکړ.
