ښکېل اړخونه به د مخورو تر بيا ځل راټوليدو د يو و بل پر وړاندې هيڅ ډول اقدام نکوي
د پکتیکا ولایت په مرکز ښرنه کې د دفتاڼې قوم د دوو کورنیو ترمنځ شخړه پېښه شوې وه چې له امله چې یو تن وژل شوی وو څو تنه علما او مشران د منځګړي په توګه جرګه شول. د دغه ولایت د سرحدونو، قومونو او قبایلو چارو ریاست، قومي مشرانو او علماوو د یادې شخړې د هواري او له منځه وړلو لپاره له دواړو لوریو سره ناسته وکړه او دوی یې د سولي او ورورولۍ لوري ته راوبلل. د سرحدونو، قومونو او قبایلو رئیس مولوي جان محمد مؤمن جرګې ته د بدۍ د بدو عواقبو او د بښنې د ښېګڼو په اړه د اسلام د مبارک دین په رڼا کې مفصلې خبرې وکړې او ښکېل لورې یې روغې جوړې ته راوبلل. جرګې د مقتول کورنۍ ته د صبر او حوصلې کولو سپارښتنه وکړه او زياته يې کړه چې د شخړې د اساسي هواري په موخه به مشران د نيکمرغه لوی اختر له تېرېدلو وروسته ورته حل لاره پیداکوي. ښکېلو اړخونو قومي مشرانو ته ډاډ ورکړ چې ته راتلونکې جرګې مرکې پورې به د یو او بل پر خلاف هيڅ رنګه اقدام نکوي.
