د ترانسپورت نوی عمومي مدیر په دنده وګمارل شو
مولوي عبدالغفور صابح د سرحدونو، قومونو او قبایلو چارو وزارت د حکم پر اساس نن د یوې ناستې په ترڅ کې د یاد وزارت د مالي او اداري عمومي ریاست اړوند د ترانسپورت د عمومي مدیر په توګه وټاکل شو.
په دغو مراسمو کې د وزارت د بشري سرچینو رئیس مولوي کریم شاه تیلوي، د تدارکاتو رئیس مولوي سید امین اغا، د سرحدي تخطیو دکشف رئیس مولوي نصیراحمد منصور، له ولایتونو سره د اړیکو آمر مولوي عبدالوارث اخندزاده او نورو کارکوونکو ګډون کړی وو.
په پیل کې د بشري سرچینو رئیس ښاغلي تیلوي د نوموړي د مقررۍ په اړه خبرې وکړې او ویې ویل: د ترانسپورت عمومي مدیریت د وزارت له ډېرو مهمو مدیریتونو څخه دی او نوی ټاکل شوی مدیر ورته د امانتدارۍ او اهلیت په اساس ټاکل شوی. نوموړي همدا راز وویل: دنده امتیاز نه بلکې یو لوی مسؤلیت دی او زه باوري یم چې ښاغلی صابح به یې پوره صداقت سرته رسوي.
وروسته د تدارکاتو رئیس ښاغلي سید امین اغا تغیر او تبدیل د ادارتو یو اصل وباله او یاد مدیریت یې د وزارت د لوجستکي چارو د چټکتیا او سمبالښت یوه مهمه برخه یاده کړه. هغه له نورو کارکوونکو څخه وغوښتل چې په اصولي او قانوني کړنو کې یو له بل سره په پوره همغږي خپل کارونه مخ ته یوسي.
