په دایکندي ولایت کې د دوو قومونو تر منځ شخړه حل شوه
د دایکندي ولایت د سادات او هوتک قومونو تر منځ را منځته شوې شخړه د یاد ولایت د سرحدونو، قومونو او قبایلو چارو آمریت او د یادو قومونو د مشرانو په منځګرېتوب د یوې ناستې په ترڅ کې په سوله بدله شوه. په دغه غونډه کې قومي مشرانو د سرحدونو، قومونو او قبایلو چارو آمریت له هڅو څخه مننه وکړه او زیاته یې کړه چې یاد آمریت د یووالي، پخلاینې او قومي ستونزو د حل لپاره نه ستړې کیدونکې هلې ځلې کړې دي. وروسته د یاد ولایت د سرحدونو، قومونو او قبایلو چارو آمر حافظ محیب الله سجاد وویل: د قومونو ترمنځ یووالی او پخلاینې راوستل او د هغوی د ستونزو اورېدل زموږ مسؤولیت دی او د یاد آمریت دروازې د دغه ولایت د عزتمندو ولسونو پرمخ تل خلاصې دي.
