د سرحدونو قومونو او قبایلو چارو وزیر خوست ولايت ته رسمي سفر تر سره کړ
۱۴۴۳/۹/۱۹
د سرحدونو قومونو او قبایلو چارو سرپرست وزير ملا نورالله نوري پرون د خوست ولايت سپېرې ولسوالۍ د مظلومو شهيدانو فاتحې او تعزيت لپاره يادې سېمې ته سفر تر سره کړ. ښاغلي نوري د شهيدانو ارواح ته دعا وکړه او د پېښې له ټولو قربانيانو سره يې ژوره غمرازي او همدردي وښوده. ياده پېښه چي د روژې مياشتې پر ۱۵مه رامنځته شوه د پاکستاني الوتکو له لوري ډيورنډ فرضي کرښې ته څيرمه دوه کورونه پکي بمبار شول او ۳۷ تنه يې چي اکثريت ښځې او ماشومان وو په شهادت ورسول. ښاغلي وزير قومي او قبايلي مشرانو ته وويل چي په افغانستان کي د هر وګړي ژوند ساتل د نظام دنده او مکلفيت دی. نوموړي ځايي خلکو ته ډاډ ورکړ چي اسلامي امارت د خپلې خاورې تماميت ته پوره ژمن دی او هيچا ته به اجازه ورنکړي چي د افغانستان د خلګو امنيت وګواښي.
