افغانان به د خپلو امنيتي ځواکونو اتلولي هېڅکله هم هېره نه کړي!
د هېواد د وياړلي ملي امنيتي ځواکونو منسوب مېرويس تېره شپه د هرات ولايت د غوريانو په ولسوالۍ کې په چاودېدونکو توکو بار د ترهګرو يو موټر هدف ته له رسېدو مخکې په نښه او له منځه يووړ .
اتل مېرويس په داسې حال کې چې پوهېده دغه اقدام يې ژوند ګواښي خو له خپلې خاورې او خلکو سره د ده بې سارې مينې او د خپلو هېوادوالو ژوند ته د ارزښت ورکولو په خاطر يې سخت مقاومت وکړ او د خپلې پاکې وينې په بيه يې مکار دښمن پرې نه ښود، چې خپلې ناروا موخې ته ورسېږي.
د سرحدونو اوقبايلو چارو وزارت په داسې حال کې، چې د ملي امنيتي ځواکونو د دغه زړه ور او په هېواد مين منسوب اتلولي ستایي، خپلو هېوادوالو ته ډاډ ورکوي، چې افغانان د دغه شان زړه ورو او سرښندونکو منسوبينو په لرلو سره به تل د ترهګرو په وړاندې د اوسپنيز سپر په شان ولاړ وي.
ژوندي او سرلوړي دې وي زموږ د ملي امنيتي ځواکونو زړه ور اتلان
محب الله صميم
د سرحدونو او قبايلو چارو وزیر
