دیني عالمان دې په هېواد کې د منبرونو له لارې ولسونو ته د اسلام د مبارک دین اصلي پیغام، چې هغه د سولې، ورورولۍ او مینې پیغام دی ورسوي!
د اسلام مبارک دین خلکو ته د یووالي، همکارۍ او سولې درس ورکوي.
یاد اصل ته په کتو زموږ په ګران هېواد افغانستان کې روانه تپل شوې جګړه ناروا او د نورو د ګټو جګړه ده، روانه جګړه د اسلام د مبارک دین د ارشاداتو خلاف جګړه ده اود اسلام مبارک دین زیات ټینګار پر سولې کوي.
نو دا چې موږ د اسلام مبارک دین ته ژمن او بشپړ احترام لرو، نو زموږ فرهنګ جګړه نده.
د افغان ولس فرهنګ وینه توئېدنه نده، د افغان ولس فرهنګ نفرت او لرې والی ندی، زموږ فرهنګ د مینې، محبت او یووالي فرهنګ دی او بدبختانه تپل شوې ناروا جګړې، زموږ کلتور هم متضرر کړ، مسجد چې زموږ په دین او هم زموږ په کلتور کې د عبادت ځای دی او موږ یې د خدای ج کور بولو بدبختانه دا هم په امن کې پاتې نشو، زه پر دیني عالمانو غږ کوم، چې د اسلام اصلي پیغام، چې هغه د سولې، مینې او ورورولۍ پیغام دی د منبر له لارې یې تر ولسونو پورې ورسوئ تر څو روانه جګړه پای ته ورسېږې او په ګران هېواد کې مو یوه با عزته او تلپاتې سوله ټینګه شي.
محب الله صمیم
د سرحدونو او قبایلو چارو وزیر
