د سولې په چارو کې د دولت او سرحدونو او قبایلو چارو وزارتونو ترمنځ د ګډو پروګرامونو په پلي کولو خبرې وشوې!
د سرحدونو او قبایلو چارو وزیر ښاغلي محب الله صمیم نن غرمه د سولې په چارو کې د دولت له وزیر ښاغلي سيد سعادت منصور نادري سره وکتل.
په دې کتنه کې د تلپاتې سولې په ټينګښت کې د دواړو ادارو ترمنځ په ګډو کارونو، د یو بل په همکارۍ په مرکز او ولایتونو کې د سولې او نظام ملاتړ په اړه د خلکو د نظریاتو او افکارو راټولولو، سولې ته د رسېدو په موخه د ملي اجماع د پياوړي کولو او په دې اړه له شته فرصتونو څخه د اغېزمنې استفادې، د نظام او ملي ځواکونو ملاتړ ته د ټولنې د بېلابېلو اقشارو د رابللو او د خلکو د غوښتنو، نظرياتو او ستونزو اورېدو او هغو ته د حل لارو چارو د پیدا کولو په اړه بحث او د نظر وړ خبرې وشوې او د دواړو ادارو ترمنځ د ملي مسایلو په اړه په ګډ کار باندې ټینګار وشو.
په دې لیدنه کې دغه راز په بېلابېلاو ولایتونو په تېره بیا غزني ولایت کې د نظام او ملي ځواکونو ملاتړ ته د خلکو د رابللو او وېښتابه کې د سرحدونو او قبایلو چارو وزارت د مشرتابه هلې ځلې وستایل شوې.
