د بېلابېلو ولایتونو له یو شمېر قومي مشرانو او مخورو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې وروسته د بېلابېلو ولایتونو له یو شمېر قومي مشرانو او مخورو سره د خپل کار په دفتر کې وکتل او د دوی ستونزې یې واورېدې.
په دې کتنه کې راغلو قومي مشرانو او مخورو د خپلو یو لړ سیمه ییزو ستونزو شریکولو ترڅنګ د سرحدونو او قبایلو چارو وزارت له مشرتابه څخه مننه وکړه، چې پر وخت د خلکو ستونزو اوري او حل لارې ورته پیدا کوي.
نوموړو دغه راز د وزارت له مشرتابه څخه مننه وکړه، چې د قومي مشرانو، دیني عالمانو، مخورو او ځوانانو سره هميشه په قومي، علمي، فرهنګي، ټولنیزو او سیاسي چارو کې سلامشورې کوي.
ورپسې ښاغلي محب الله صمیم د یادو قومي مشرانو ستونزې پر ځای وبللې وې ویل: چې هڅه به مو دا وي، ترڅو ستاسو مشرانو ستونزو ته پر وخت رسېدنه وکړو او په بېلابېلو برخو کې مو سلامشورې، غوښتنې، وړاندیزونه او نظریات له ځان سره ولرو، ځکه چې د سرحدونو او قبایلو چارو وزارت د ټولو مېشتو درنو قومونو ګډ کور دی او د تل په څېر یې دروازې ستاسو پر مخ پرانېستې دي.
