د پکتیکا ولایت له یو شمېر قومي مشرانو او مخورو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې مخکې د پکتیکا ولایت له یو شمېر قومي مشرانو او مخورو سره د خپل کار په دفتر کې وکتل.
په دې کتنه کې راغلو قومي مشرانو خپلې یو لړ سیمه ییزې ستونزې، چې په بېلابېلو برخو کې وې د حل په موخه له ښاغلي صمیم سره شریکې کړې او د وزارت له مشرتابه څخه یې مننه او قدرداني وکړه، چې د ولسي بسیج، ملي یووالي او د قومي جوړښتونو د پیاوړتیا په برخو هلې ځلې کوي.
دغه راز یادو مشرانو د موجوده نظام څخه د بشپړ ملاتړ څرګندولو ترڅنګ له وزارت سره د خپلو همکاریو ډاډ ورکړ.
ورپسې ښاغلي محب الله صمیم د راغلو مشرانو ستونزې پر ځای وبللې وې ویل: د پکتیکا ولسونو تل د نظام او لوړو ملي ګټو ملاتړ کړی، چې موږ یې د قربانیو قدرداني کوو همدا راز له قومي مشرانو او مخورو مو غوښتنه دا ده، چې ولسونه یووالي، سولې او ثبات ته وهڅوي، ترڅو ناخوالو ته د پای ټکې کېښودل شي او هېوادوال مو په ارامه فضا کې ژوند وکړي.
د یادونې وړ ده، چې ښاغلي عزیز احمد خان فرزه وال او ملګرو یې نقاشي شوى انځور ښاغلي محب الله صمیم ته ډالۍ کړ.
