د وزیرو له یو شمېر قومي مشرانو او مخورو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې مخکې د وزیرو له یو شمېر قومي مشرانو او مخورو سره د خپل کار په دفتر کې وکتل.
په دې کتنه کې راغلو قومي مشرانو د خپلو یو لړسیمه ییزو ستونزو شریکولو په ترڅ کې، چې د وزارت په اړوندو لېسو کې د وزیرو ځوانانو ته د ونډې او روغتیایې اسانتیاوو برابرولو په برخو کې وې د سرحدونو او قبایلو چارو وزارت له مشرتابه سره د حل په موخه شرېکې کړې.
نوموړو دغه راز وویل: د وزیرو قوم هم د دې هېواد لپاره نه ستړې کیدونکي هلې ځلې ترسره کړي او په هر ډول شرایطو کې يې د خپل نظام، امنیتي او دفاعي ځواکونو څخه په بشپړه توګه ملاتړ کړی او د نورو هېوادوالو ترڅنګ یې د هېواد د آبادې او سوکالۍ لپاره هڅې کړي.
ورپسې ښاغلي محب الله صمیم په خپلو خبرو کې د یادو قومي مشرانو ستونزې پر ځای وبللې وې ویل: د سرحدونو او قبایلو چارو وزارت په هېواد کې د ټولو مېشتو درنو قومونو او قبایلو ګډ کور دی او د وزیرو قوم ځلانده تاریخ لري، چې تل یې د خپل هېواد څخه په مېړانه دفاع کړې او د خپل نظام ترڅنګ ولاړ دي.
ښاغلي صمیم وویل: تاسو درانه مشران کولای شې، چې خپلې ستونزې موږ ته په ډاګه کړئ، چې ستونزو ته به مو د وزارت له امکاناتو سره سم د حل لارې چارې پیدا کړو.
