د سرحدونو او قبایلو چارو سرپرست او نوماند وزیر ښاغلي محب الله صمیم نن له غرمې مخکې په ولسي جرګه کې د ننګرهار ولایت د خلکو له استازي ښاغلي فریدون خان مومند او له یو شمېر قومي مشرانو سره د خپل کار په دفتر کې وکتل.

په دې کتنه کې ښاغلي مومند د خپلو یو لړ سیمه ییزو ستونزو شریکولو ترڅنګ د ملي یووالي، سولې د ټینګښت او د ولسونو ترمنځ د اړیکو د پراختیا په برخه کې ښاغلی محب الله صمیم وړ شخص یاد کړ او له وزارت سره یې د خپلو همکاریو ډاډ ورکړ.

ورپسې ښاغلي محب الله صمیم د راغلو مشرانو ستونزې پر ځای وبللې وې ویل: د سولې او امن د راوستو په برخه کې موږ هریو تر خپلې وسې پورې مسؤلیت لرو، چې په رښتیني توګه یې ترسره کړو د خلکو استازي او قومي مشران سره په متحدانه توګه هلې ځلې وکړو، ترڅو شته ستونزې له منځه ولاړې شي او په هېواد کې مو د امن او ورورولۍ فضا رامنځته شي.