څو کلنه بدي په کُنړ ولایت کې په سوله بدله شوه
د کنړ مرورې ولسوالۍ د چیغسرای په سیمه کې له کلونو راهیسې د څو کورنیو ترمنځ پېښه شوې شخړه چې وخت ناوخت به پکې دواړو لوریو یو بل ته زیانونه اړول او څو تنه تر اوسه پکې ژوبل شوي هم وو، تېره ورځ د سرحدونو، قومونو او قبایلو چارو ریاست، د علماوو شورا او قومي مشرانو په منځګړیتوب حل شوه.
د شخړې د حل و فصل په غرض ښکېلو غاړو عام وتام واک د سرحدونو، قومونو او قبایلو چارو د رئیس ملا تحمیدالله غازي او نورو مسؤلینو په حضور کې څو تنو مرکچیانو ته ورکړ. مرکچیانو د موضوع له پوره پلټنې وروسته عادلانه پرېکړه وکړه چې دواړو لوریو پرې قناعت وکړ او د مصلحینو پر وړاندې یې یو بل ته د ورورولۍ غېږه ورکړه.
