په ولسي جرګه کې د خلکو له استازو کتنه!
د سرحدونو او قبایلو چارو وزیرښاغلي محب الله صمیم نن پنجشنبې د روان لمریز کال د لیندۍ میاشتې پر ۱۳ مه نېټه په ولسي جرګه کې د ننګرهار او هلمند ولایتونو د خلکو له استازو ښاغلي امیر خان یار او سید احمد خادم سره د خپل کارپه دفترکې وکتل.
د کتنې په پیل کې یادو استازو ښاغلي محب الله صمیم ته د سرحدونو او قبایلو چارو د وزیر په توګه د ولسي جرګې له غړو څخه د باور رایو ترلاسه کولو له امله مبارکي وویله، وې ویل: د قومي جوړښتونو او د یووالي په برخه کې موږ همداسې مخورو مشرانو ته اړتیا لرو، ترڅو د قومونو ترمنځ د بي اتفاقۍ اوهرډول ژبني، سمتي او مذهبي توپيرونو مخه ونیسي او له مشرانو سره په سلامشورو خپلې چارې پرمخ بوځي.
ورپسې د سرحدونو او قبایلو چارو وزیر ښاغلي محب الله صمیم د نوموړو استازو له ملي احساس څخه د مننې په ترڅ کې وویل: د چارو پر مخ وړلو کې هرڅوک باید له صداقت او رښتینولۍ څخه کار واخلي زه هم د خپلو خلکو په وړاندې ځینې مسؤلیتونه لرم او کوښښ به مې دا وي، چې دغه مهم مسؤلیتونه ستاسو درنو استازو په همکارۍ په سمه توګه ادا کړم.
