د سرحدونو او قبایلو چارو سرپرست او نوماند وزیر ښاغلي محب الله صمیم، د وزارت مرستیالانو، رئیسانو او کارکوونکو په ګډون نن سه شنبې د ۱۳۹۹ لمریز کال د لړم پر ۱۳ نېټه په هېواد کې د ترهګریزو پېښو قربانیانو، شهیدانو او ټپیانو ته د عظیم الشان قران د ختم په ترسره کولو دعا وشوه.

له ختم وروسته د سرحدونو او قبایلو چارو سرپرست او نوماند وزیر ښاغلي محب الله صمیم خبرې وکړې، وې ویل: د قران عظیم الشان د دغه ختم ثواب دې ټولو شهیدانو، هغوی چې د هېواد د دښمنانو له خوا څو ورځې وړاندې د کوثر په تعلیمي مرکز له هغه مخکې په ننګرهار، هلمند، کندهار، ارزګان، غور او نورو ولایتونو او په کابل پوهنتون د پروني برید ځوانو محصلینو نجونو او ځوانانو ته، چې په راتلونکې کې یې هېواد او خلکو ته د خدمت کولو هیله درلودله، د هغوی روح ته ورسېږي. غمځپلو کورنیو ته جمیل صبر غواړو، واقعا یوه لویه غمیزه وه، دا زموږ ټولو مشترک غم دی، دغه راز یې پردغه علمي کانون او علمي هستۍ برید په کلکه وغندلو، د خدای (ج) له سپیڅلي دربار څخه یې هیله وکړه، چې نور دې زموږهېواد وال له داسې پېښو په امان کې وساتي.