په ننګرهار ولایت کې ۱۰ کلنه او بلخ ولایت کې ۳ کلنه دوښمني په دوستي بدله شوه
۱۴۴۶/۶/۲۷
د بلخ ولایت په چمتال ولسوالۍ کې د دوو کورنیو تر منځ د قتل موضوع له امله رامنځته شوې ۳ کلنه دوښمني د یاد ولایت د سرحدونو، قومونو او قبايلو چارو رئیس مولوي سردار محمد محمدي، د بلخ مرستیال والي الحاج مولوي نورالهادي ابو ادريس او د سیمه ایزو ادارو د یو شمېر مسؤلینو په منځګړیتوب او هلو ځلو په پایله کې حل او په دوستۍ بدله شوه.
بلخوا د ننگرهار ولایت، دره نور ولسوالۍ د سفر کلا په سیمه کې هم د دوو کورنیو تر منځ رامنځته شوې ۱۰ کلنه خپل منځي منازعه چې له امله یې ۳ تنو ته پکې مرګ ژوبله اوښتې وه او د دواړو کورنیو ترمنځ یې ژور اختلاف رامنځته کړي وو، د ننګرهار ولایت د سرحدونو، قومونو او قبايلو چارو ریاست د مسؤلینو لخوا د جوړو شویو مراسمو له لارې د ننګرهار ولایت د محلي ادارو د یو شمېر مسؤلینو، ځايي قومي مشرانو او مصلحینو په منځګړیتوب حل او دواړه کورنيو په سیمه کې د یو او بل تر څنګ د سولې او ورورولۍ نوى بهیر پیل کړ.
د یادونې ده چې د سرحدونو، قومونو او قبايلو چارو وزارت په ولايتونو کې د خپلو سیمه ییزو ادارو په مرسته د ۱۴۴۶ کال په لومړیو درې ربعو کې سلګونه لويې او وړې دوښمنۍ حل او د تل لپاره په دوستۍ بدلې کړې دي.
