په ننګرهار ولایت کې د دوو کورنيو ترمنځ ۴۲ کلنه دښمني په دوستي بدله شوه.
دوشنبه ١٤٤٦/٢/١٤
په ننګرهار ولایت کې د دوو کورنيو تر منځ د ځمکو، سرايونو او کورونو پر سر راپورته شوې ۴۲ کلنه دښمني په دوستي بدله شوه.
هغه غونډه چې په همدې موخه جوړه شوې وه پکې د سرحدونو، قومونو او قبايلو چارو رئيس الحاج رحمت الله "غازي عمر" د ننګرهار ولايت مرستيال والي مولوي سعيد احمد بنورې او ګڼو نورو مسؤلینو او ځايي اوسيدونکو، قومي مشرانو سپين ږيرو، علماء کرامو او ځوانانو ګډون کړی وو.
د غونډې هر ګډونوالو په خپل وار خبرې وکړې او د خپلمنځي دوښمنیو په ناوړه پايلو يې رڼا واچوله.
د سرحدونو، قومونو او قبايلو چارو رئيس ښاغلي غازي عمر وويل چې "په ننګرهار ولایت کې د خلکو تر منځ د پېښو شویو شخړو د حل هڅه کوي او په تېر کال کې یې لسګونه شخړې حل کړې دي.
د يادونې وړ ده چې له دې وړاندې هم د سرحدونو، قومونو او قبايلو چارو وزارت او د یاد ولایت د سرحدونو، قومونو او قبایلو چارو ریاست په هڅو د خلکو تر منځ لسګونه شخړې حل شوې دي.
