په ننګرهار ولايت کې د څلور کلنې شخړې حل
دوشنبه ۱۱ محرم الحرام ۱۴۴۷
د ننګرهار ولایت کوز کنړ ولسوالۍ په برکاشکوټ سیمه کې د يوې کورنۍ د څو غړو ترمنځ د میراث پر سر راپورته شوې څلور کلنه شخړه په سوله ییز ډول حل او فصل شوه.
د ياد ولايت د سرحدونو، قومونو او قبايلو چارو رئیس الحافظ رحمت الله غازي عمر په مشرۍ د سیمه ييزو علماوو، مشرانو او د دواړو لوريو د استازو په ګډون د يوې غونډه په ترڅ کې لومړی د ښکېلو غاړو ترمنځ د ميراث پر سر د اختلاف موضوع وڅېړل شوه او بيا د دیني لارښوونو پر بنسټ حق حقدار ته وسپارل شو، چې په همدې سره يي ياده څلور کلنه دښمني هواره او سوله ييز ژوند يې پيل کړ.
دا په داسې حال کې ده، چې همدا تېره ورځ هم د ننګرهار ولايت په شيرزادو ولسوالۍ کې د دوو کورنيو ترمنځ نږدې ۳۰ کلنه شخړه، چې له امله يې دوه تنه وژل شوي وو د ياد ولايت د سرحدونو، قومونو او قبايلو چارو ریاست د مشرانو د هلو ځلو په پايله کې د يوې غونډې پرمهال حل شوه.
