په ننګرهار، کنړ، بلخ او سمنګان ولايتونو کې څلور بيلابيلي شخړې هوارې شوي!
۱۴۴۶/۲/۱۲
د ننګرهار دره نور ولسوالۍ په شيمول کلي کې د دوو کورنيو ترمنځ درې کلنه شخړه هواره شوه او خلک يې په يوه تغر سره راټول شول. په ياد ولايت کې د سرحدونو، قومونو او قبايلو چارو د رئيس الحاج حافظ رحمت الله غازي عمر په مشرۍ او د ځايي خلکو او قومي مشرانو په منځګړيتوب دغه اوږده شخړه چې یو کس هم پکې وژل شوی و حل شوه او دواړه کورنۍ د خوښۍ په ټغر سره راټولې شوې.
ورته مهال د کنړ ولايت په سرکاڼو ولسوالۍ کې هم د اوبو د وېش پر سر رامنځته شوی جنجال پای ته ورسيد. دغه منازعه د هغې غونډې پرمهال حل شوه چې، د کنړ ولايت د سرحدونو، قومونو او قبايلو چارو رئيس ملا تحميد الله او ګڼو ځايې اوسيدونکو، مشرانو، قومي سپين ږيرو او د اسلامي امارت مسؤلينو پکې برخه لرله. دوﺉ د دغو کورنيو ترمنځ د اوبو پر سره راپورته شوې شخړه حل کړه او دواړه کورنۍ يې دوستي ته راوبللې.
د دې ترڅنګ د بلخ ولايت په کلداره ولسوالۍ کې هم د یاد ولايت د سرحدونو، قومونو او قبايلو چارو رياست لوري دوه مرورې کورنۍ پخلا شوې چې له مودو راهیسې یې یو له بل سره اختلافات لرل.
همدارنګه د سمنګان ولايت په دره صوف ولسوالۍ کې د ځمکې پر ملکيت راپورته شوي دښمني د یاد ولایت د شخړو د حل کميسون، د سرحدونو، قومونو او قبايلو چارو امر سيد محمد (سعيد) د ولسوالۍ ولسوال او مصلحينو په ګډو هلو ځلو د یوې مرکې په ترڅ کې حل شوې. د دغې جرګې پرمهال د مشرانو لخوا د عادلانه وېش له امله دواړه کورنۍ راضي او خپل عادي ژوند يې پيل کړی.
