په مرکز کابل کې د اهل تشیع قومونو له لوري د خپلواکۍ دویمه کلیزه و نمانځل شوه
۷/۲/۱۴۴۵
د اسلامي امارت د خپلواکي د دویمې کلیزې په ویاړ د مرکز کابل د دشت برچي په سیمه کې د اهل تشیع قومي مشرانو او ځوانانو له لوري و نمانځل شوه. په دغه نمانځغونډه کې د سرحدونو، قومونو او قبایلو چارو مسلکي معین الحاج مولوي احمد طه قادري، وزارت د دعوت او ارشاد رئیس مفتي شفیع الله ثاقب، د بهرنیو چارو وزارت سیاسي مرستیال شیر محمد عباس ستانکزی، نورو دولتي مسؤلینو د اهل تشیع دیني عالمانو او قومي مشرانو ګډون کړی وو. د غونډې په اوږدو کې د راغلیو قومي مشرانو په استازیتوب یوه تن خبرې وکړې اسلامي نظام یې د الله ج له لوري یوه پیرزوینه وبلله او د هزاره قومونو په نمایندګي یې د اسلامي امارت څخه ملاتړ او د هر راز همکاریو ډاډ وړاندې کړ. وروسته د وزارت په استازولي مفتي شفیع الله ثاقب د اسلامي ارشاداتو پر بناء ګډونوال یووالي او یو بل منلو ته را وبلل او راغلیو مشرانو څخه یې غوښتنه وکړه چې د غرب د تبلیغاتو پر وړاندې دي فکري مبارزه وکړي او خپل ځوانان دي د هیواد ښې رازه کولو مبارزې او کوښښ ته وهڅوي.
