په فرهنګي جشنواره کې ګډون!
د سرحدونو او قبایلوچارو وزارت د جرګو او قبایلي چارو د همغږۍ معین ښاغلي محمد یعقوب احمدزي نن په هغې جشنواره کې برخه واخیسته چې د پکول ملي ورځې په مناسبت په کابل کې د مېشتو نورستانیانو د ټولنې له خوا د استانبول په هوټل کې جوړه شوې وه.
ښاغلي احمدزي په خپلو خبروکې ددغې ورځ له امله ټولو هېوادوالو په تېره بیا نورستاني او پشه يي قومونو ته مبارکي وویله زياته یې کړه : افغانستان د ټولو مېشتو درنو قومونو ګډ کور دی٫ چې د بیلابیلو کلتورونو لرونکو قومونو شتون د هېواد د فرهنګ او تاریخ ښکارندویي کوي. ټول هېوادوال د یو بل فرهنګ ته درناوې لري دغه شان جشنوارې زموږ تاریخ او کلتور٫ چې زموږ ویاړونه دي٫ ژوندي ساتي.
نوموړي همداراز د افغانانو د اتحاد او اتفاق او نورستان د پتمنو خلکو د فرهنګ او دودونو په اړه هم څرګندونې وکړې.
