په فراه ولایت کې له خلکو سره د اسلامي نظام ثبات، د ولسونو د یووالي او انسجام غونډه وشوه
یکشنبه ۱۴۴۶/۶/۲۰
د سرحدونو، قومونو او قبایلو چارو وزارت د جرګو او قبایلو چارو د همغږۍ مرستیال د یوه پلاوي په مشري په فراه ولایت کې د اسلامي نظام ثبات، د ولسونو د يووالي او انسجام لويه ولسي غونډه جوړه کړه، چې پر مهال یې ولایتي مسؤلینو، د ولسوالیو استازو، دیني عالمانو او قومي مشرانو ګډون کړی وو.
قومي مخورو د غونډې په ترڅ کې د ولسونو ترمنځ په لا ښې همغږۍ او خپلمنځي یووالي ټینګار وکړ، زیاته یې کړه: اشغالګر دلته یوازې د ظلم او وحشت لپاره راغلي وو، د بیا ځلې لپاره باید ورته د راتلو زمینه برابره نه کړو. دوی اسلامي نظام ساتل او په استحکام کې یې ونډه اخیستل د هر افغان دنده وبلله او د اسلامي امارت د زعیم امیر حفظه الله فرمانونو او اوامرو ته یې لبیک ووایه.
قومي مشرانو د ډاډ په څرګندولو سره وویل لکه څنګه مو چې د اسلامي نظام د استحکام او خپلواکۍ لپاره قربانۍ ورکړې، اوس هم د دې نظام د بقاء لپاره چمتو یو.
د جرګو او قبایلي چارو د همغږۍ مرستیال الحاج مولوي محمد علي جان احمد غونډې ته په خبرو کې د افغان ولس مېړانه وستایله او د زبرځواکونو شړل یې لومړی د الله تعالی احسان او بیا د ولس د قربانیو برکت یاد کړ. هغه زیاته کړه: دا نظام د دې ولسونو په قربانیو راغلی، خدمت او ساتنه یې زموږ مسؤلیت دی. هغه وویل: دا نظام ستاسو نظام دی، پرون که د جهاد وخت و، نن هغه وخت را رسېدلی چې دا نظام له دښمنانو وساتو او پرځان بسیاینې ته یې ورسوو.
د غونډې په ترڅ کې د جرګو او قبایلي چارو د همغږۍ رئیس شیخ نیک محمد افغاني هم خبرې وکړې ویې ویل: د افغانانو یووالی او اتحاد وو، چې د نړۍ لسګونه هیوادونه مو له پاکې خاورې په ټيټو سترګو ووتل او له اسلامي نظام څخه یې برخمن شوو.
