په غزني ولایت کې له قومونو سره د یووالي او همغږۍ غونډه
۲۵\۶\۱۴۴۵
د سرحدونو، قومونو او قبایلو چارو وزارت له قومونو سره د همغږۍ په پار په غزني ولایت کې یوه ستره ولسي غونډه تر سره کړه.
په دغه غونډه کې د یاد وزارت د جرګو او قبایلو چارو د همغږۍ معین الحاج ملا عبدالخالق عابد اخند، د جرګو او قبایلو چارو رئیس شیخ حضرت ولي حقاني، د یاد ولایت والي الحاج حافظ محمد امین عمري، د اداراتو مسؤلینو، سلګونه دیني علماوو او قومي مشرانو ګډون کړی وو.
قومي مشرانو په خپلو خبرو کې د تېرې ادارې فساد ته اشاره وکړه او زیاته یې کړه چې په تېرو شلو کلونو کې د افغانانو حقوق او ملي شتمني لوټ شوې وه، همداراز قومي مشرانو د امارت په راتګ سره د قومونو تر منځ د شخړو او جګړو په حل کولو او د بې اتفاقیو له منځه وړلو باندې خوښي څرګنده کړه.
د جرګو او قبایلو چارو د همغږۍ رئیس ښاغلي حقاني راغلیو مشرانو ته وویل: الحمد لله اوس په وطن کې اسلامي نظام قائم دی، د هیوادوالو حفاظت زموږ فریضه او د قومونو تر منځ اتفاق زموږ دنده ده.
په پای کې د جرګو او قبایلو چارو د همغږۍ معین حاجي عابد اخند حاضرینو ته وویل چې د اسلامي امارت په راتګ سره هر څه خوندي دي، افغانستان شل کاله جنګونو ځپلی او ویجاړ کړی دی، جوړول به طبعا وخت اخلي، خو د ا.ا.ا د مشرانو هڅې دا هیلې راکوي چې په لنډ وخت کې به یو پر مخ تللی افغانستان ووینو.
