په بلخ ولايت کې ۱۲ کلنه دښمني په دوستۍ بدله شوه
یکشنبه ۱۴۴۶/۵/٢٢
د بلخ ولايت دولت آباد ولسوالۍ په تلي ګک سيمه کې د دوو کورنيو ترمنځ ۱۲ کلنه اوږده شخړه په داسې مهال پای ته ورسېده، چې د يوې جوړې شوې غونډې پرمهال پکې د دغه ولايت د سرحدونو، قومونو او قبايلوچارو رياست مسؤلينو، قومي مخورو، علماوو او لسکونه ځايي اوسيدونکو ګډون درلود.
د روغې جوړې په يادو مراسيمو کې د اسلامي امارت مشرانو او علماوو له فيصلې کولو وروسته د ولسونو ترمنځ په اتفاق ټينګار وکړ او له ښکېلو لوریو يې وغوښتل، چې د دښمني پرځاي يو بل ته مينه ورکړي ترڅو ژوند په اخوت او ورورولۍ سره تر سره کړي.
شخړه کوونکې کورنۍ چې له دغه اوږده جنجال څخه نورې په تنګ راغلې وې، د مصلحينو په عادلانه پريکړه یې خوښي څرګنده کړه او يو بل ته د بښنې په کولو سره غاړه غړۍ شول، چې په همدې ترتيب يې ياده ۱۲ کلنه دښمني پای ته ورسېده.
