په ارزګان کې د دوو مرورو کورنیو پخلاینه
یکشنبه ۸/ رجب المرجب/ ۱۴۴۷
د ارزګان ولایت په مرکز ترینکوټ کې د کورني تاوتریخوالي له کبله د دوو کورنیو ترمنځ پېښه شوې شخړه چې دواړه خواوې یې له ډېرې مودې راهیسې په ستونزو کې سره لاس و ګریوان وو، تېره اوونۍ د سرحدونو، قومونو او قبایلو چارو ریاست او ځایي قومي مخورو په هلوځلو او ستړیاوو حل او په دوستي بدله شوه.
یاده شخړه په داسې حال کې رامنځته شوې وه، چې د کورنيو ستونزو له کبله پکې یوې مېرمنې ژوند بایللی و چې له وجهې یې د وژل شوې مېرمنې کورنۍ او بل لوري ترمنځ ګڼ خنډونه پیدا کړي وو، خو له نېکه مرغه د مسؤلینو او مخورو مشرانو په منځګړیتوب او هڅو دواړه لوري روغې جوړې ته راضي شول.
د شخړې د حل لپاره قومي مخورو او مسؤلینو متعددي ناستې وکړې او په جنجال کې ښکېلې کورنۍ یې اخوت او بښنې ته راوبللې، چې بلاخره د طرفینو رضایت واخیستل شو او د یوې غونډې په ترڅ کې دواړه لوري سره پخلا شول. ښکېلو غاړو د پخلاینې پرمهال ژمنه وکړه چې نور به له اختلافاتو تېرېږي او د وروڼو په څېر یو له بل سره ژوند کوي.
