هرات کې د مسؤلينو له لوري يوه پخوانۍ خونړۍ شخړه پای ته ورسېده
چهار شنبه ۱۹ صفرالمظفر ۱۴۴۷
د سرحدونو، قومونو او قبايلو چارو وزارت يوه پلاوي هرات ولايت ته د خپل سفر په ترڅ کې د ياد ولايت په کشک کهنه سيمه کې د څو کورنيو ترمنځ د کلونو کلونو اوږدمهاله شخړه، چې ګڼې ستونزې يې را ولاړې کړې وې حل او ښکېل لوري يې د سولې په ټغر سره کېنول.
د دغه شخړې پرمهال، چې له دواړو لوريو پکې ۱۲ تنه وژل شوي وو، څو تنه پکې ټپيان شوي وو او ګڼ مالي زيانونه يې هم ترشا پرېښي وو د ياد وزارت د دعوت او ارشاد رئيس مفتي شفيع الله ثاقب، د تفتيش رئيس شيخ حضرت ولي حقاني او د مقام د شخړو د حل سلاکار محمد اجان رهبر په شمول د قومي مشرانو او علماوو په ګډو همکاريو روغې ته امده شول.
يادو مسؤلينو د دواړو کورنيو ترمنځ د پخلاينې منصفانه پرېکړه وکړه، چې د طرفينو د خوښي وړ وګرځيده او په همدې سره يې تېر هېر کړل او د نوي ژوند لپاره يې د سولې او بښنې لاسونه سره ورکړل.
