موږ باید په یووالي او همغږۍ په هېواد کې شته ستونزې تحلیل او د حل لارې چارې ورته ولټوو!
دغه څرګندونې د سرحدونو او قبایلو چارو وزیر ښاغلي محب الله صمیم د ډ افغانستان ملي امنیت شورا له سیاسي او ولسي مرستیال ښاغلي سرور احمدزي سره د کتنې پر مهال وکړې.
په دې کتنه کې دواړو لورو د سولې، ملي یووالي، د حکومت او ولسونو تر منځ د واټن په لنډولو، د قومي جوړښتونو پر پیاوړتیا او ورته نورو مسایلو په اړه بحث او خبرې وکړې.
دغه راز په دې کتنه کې ښاغلي محب الله صمیم وویل، چې هېواد مو تر بل هر وخت په اوس وخت کې اوربند ته زیاته اړتیا لرې ځکه تلپاتی اوربند د با عزته سولې د ټينګښت سبب کيږي او دا د ټولو هېوادوالو غوښتنه ده.
نوموړي دغه راز پر مخالفینو غږ وکړ، چې اوربند وکړي نور دې افغانان نه وژني، ښاغلي صمیم له ولسونو وغوښتل چې د هېواد په هره برخه کې باید د تلپاتې اوربند لپاره خپل غږ اوچت کړي تر څو روانو بدبختیو ته د پای ټکی کېښودل شي.
