موږ باید د جمهوریت تر چتر لاندې د ملي ارادې پر بنسټ په هېواد کې د سولې ټینګښت او د نظام د پیاوړتیا لپاره کار وکړو!
دا څرګندونې د سرحدونو او قبایلو چارو وزیر ښاغلي محب الله صمیم نن له غرمې وروسته د غزني د ککرک ولسونو د ټولنیزې او فرهنګي شورا له مشرتابه او ګڼ شمېر غړو سره د کتنې پر مهال وکړې.
په دې کتنه کې د یادې ټولنیزې او فرهنګي شورا د غړو په استازیتوب محمد یوسف رضایي خبرې وکړې او د یادې شورا د ټولنیزو فعالیتونو په اړوند ښاغلي محب الله صمیم ته معلومات وړاندې کړل. وی ویل: یاده شورا په فرهنګي او ورته نورو برخو کې د قومونو د منسجم کېدو او یووالي لپاره کار کوي.
دوی دغه راز زیاته کړه، چې له دې فعالیتونو څخه مو موخه دا ده چې د هېواد قومونه د یو او بل له فرهنګ سره اشنا شي او فرهنګي اړیکې پراختیا ومومي ، همدارنګه د یادې شورا غړو خپلې یو لړ سیمه ییزې ستونزې چې د پوهنې، روغتیا، پراختیایي پروژو او ورته نورو برخو کې وې د وزارت له مشرتابه سره د حل په موخه شریکې کړې.
ورپسې د سرحدونو او قبایلو چارو وزیر ښاغلي محب الله صمیم خبرې وکړې، د دوی شته سیمه ییزې ستونزې یې پر ځای وبللې وی ویل: موږ باید د جمهوریت تر چتر لاندې د نظام ملاتړ او د سولې او اوربند د ټینګښت لپاره هڅې وکړو تر څو په هېواد کې مو روانه تپل شوې جګړه ختمه او پرځای یې د مینې او ورورولۍ ویاړمن ټغر د تل لپاره وغوړېږي.
ښاغلي صمیم وویل: چې د شته ستونزو د حل یواځینۍ لار د سولې او ملي یووالي ټینګښت دی او موږ ټول باید په ګډه دې سپېڅلې موخې ته کار وکړو هڅه مې پیل کړې او د قومونو او ولسونو منځ ته ځم تر څو دغه ولسونه سره منسجم شي او دا مې له کاري لومړیتوبونو څخه دي.
په پای کې ښاغلي محب الله صمیم دوی ته ډاډ ورکړ، چې
ستونزې به یې د حل په موخه له اړوندو ادارو سره شریکې کړي.
