له زابل، بغلان او فارياب وروسته نن په جوزجان ولايت کې د اسلامي نظام د ثبات، د ولسونو د یووالي او انسجام غونډه ترسره شوه
شنبه ۲۵/۳/۱۴۴۶
په دغه ولسي غونډه کې د ولایتي ادارې د مشرانو تر څنګ د سرحدونو، قومونو او قبايلو چارو وزارت د جرګو او قبایلي چارو معين الحاج مولوي محمد علي جان احمد، د جرګو او قبایلي چارو د همغږۍ رئيس شيخ حضرت ولي حقاني، د شخړو د حل سلاکار مولوي محمد آجان رهبر، د اطلاعاتو او عامه اړيکو رئيس مفتي تسليم الله حقاني، د جوزجان ولايتي مسؤلينو، قومي مشرانو او ګڼ شمېر ولسي خلکو ګډون کړی وو.
د دغې غونډې پر مهال د جرګو او قبایلي چارو د همغږۍ مرستیال الحاج مولوي محمد علي جان احمد ګډونوالو ته وويل: افغان با وقاره ولس څوڅو ځله کفري ځواکونه مات کړل، انګريزان، روسان او د امريکا په مشرۍ يې د ناټو قوتونو ته چې د دې خاورې د اشغال لپاره يې حشر کړی و په ګونډو کړل. نوموړي همدارنګه وويل: له اشغالګرو سره یوځای هغه خلک هم وتښتېدل چې د دوی په لمسون يې خپل قوم او افغانيت پرېښود. په دې سره د ټولنې فاسد قشر ټول او له هیواده و وت چې لله الحمد اوس اصلي افغانان ټول د سولې په ټغر ناست دي.
د یادې ولسي غونډې په ترڅ کې د جرګو رئيس شيخ حضرت ولي حقاني هم خبرې وکړې ویې ويل: افغانستان د قوي امپراتوريو څخه را تير شوی هيواد دی، د وخت هر دښمن ته يې غاښ ماتوونکی شکست ورکړی، ځانونه يې قرباني کړي، د ازادۍ او خپلواکۍ ژوند يې غوښتی او د خپلو سرونو په نظرانه يې د کفارو له وحشتونو دا وطن ساتلی دی. په ناسته کې د شخړو د حل سلاکار مولوي محمد آجان رهبر د خپلو خبرو پرمهال زیاته کړه: د اميرالمؤمنين حفظه الله له لوري په جګړه کې ښکېلو لورو ته له فتحې وروسته د عمومي عفوې هدف د جګړې پاي او د ولسونو اتحاد ياد و، چې د الله په فضل اوس ټول په اتحاد د وروڼو په څېر ژوند کوو.
قومي مشرانو په خپلو خبرو کې دا د اسلامي نظام برکت ياد کړ، چې نن ولسونو ته په يوه سترګه کتل کيږي، تبعيض نشته، ستونزې يې اوريدل کيږي، تر لوړ رتبه مسؤلينو رسيږي او د حل په لارو يې کار کيږي قومي مخورو په ځينو برخو کې د رغنيزو کارونو غوښتنه هم وکړه چې پکې د سړکونو، پلچکونو او ښوونځيو رغونه او ځوانانو ته د کاري فرصتونو برابرول ياد کړل.
