له دیني عالمانو سره کتنه!
د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزي نن دوشنبې د ۱۳۹۸ لمریز کال د سلواغې میاشتې پر ۷ مه نېټه له دیني عالمانو ښاغلیو مولوي حنیفي، شیخ عبدالله او مفتي عبدالشکور سره د خپل کار په دفتر کې وکتل.
په دې کتنه کې، چې د اطلاعاتو او عامه اړیکو رئيس ښاغلی عبدالوحید خاورې هم حاضر و، راغلو دیني عالمانو د خپلو یو لړ ستونزو شریکولو، ترڅنګ د ملي یووالي، د سولې ټینګښت او د قومونو د انسجام په برخه کې د سرحدونو او قبایلو چارو وزارت هڅې او هلې ځلې وستایلې او په دې برخو کې یې د خپلو تلپاتیو همکاریو ډاډ ورکړ.
ورپسې د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزي په خپلو خبرو کې د یادو دینی عالمانو ستونزې پر ځای وبللې او په قومي او ملي مسایلو کې یې د دیني عالمانو سلا مشورې له ارزښته ډکې وبللې او د دوی سره یې په همغږۍ ټینګار وکړ.
د یادونې وړ ده، چې په دې کتنه کې د وزارت مسلکي مرستیال ښاغلي بارکزي د حج او اوقافو وزارت له خوا د هدیه شویو قران شریفونه له جملې څخه (۶) ټوکه یادو دیني عالمانو ته د ثواب په نیت هدیه کړل.
