د کندز ولايت له قومي مشرانو سره کتنه
١٤٤٤قمري کال د ربيع الثاني ١٩مه
د سرحدونو، قومونو او قبايلو چارو وزارت مقام د دفتر رئيس ښاغلي شيخ حضرت ولي حقاني نن له غرمې مخته په خپل کاري دفتر کې د کندوز ولايت له قومي مشرانو سره په داسې حال کې ولیدل چې د تحقيق او مطالعاتو رئيس ښاغلي مولوي هدايت الله حقاني هم حضور درلود. د راغلو مشرانو په استازيتوب حاجي ارباب اعظم، وکيل گل محمد عابد، ډاکتر محمد هاشم او عبدالکريم د خپلو خبرو په ترڅ کې د اسلامي نظام پايښت، قوت او تقويت د ټول افغانانو غوښتنه وبلله، هغوی په کندز ولايت کې د نوې تشکيل شوې ولسوالۍ کلباد په اړه ځيني غوښتنې او پيشنهادونه وړاندې کړل. ورپسې ښاغلي حقاني د مشرانو د راتگ له امله مننه وکړه هغه وویل: چې ستاسو ستونزې مو واوريدلې او د حل په موخه به د سرحدونو ، قومونو او قبايلو چارو له سرپرست وزير سره هم شريکې شي. ښاغلي حقاني د کندز ولايت مشرانو ته د هر راز همکارۍ ډاډ ورکړ.
